عندما تلقيت مكالمتها كان صوتها المتهدج ينبىء بكارثه..
لم أكن قد سمعت صوتها منذ فتره بعيده ولهذا سألتها…:
رنا…أنتى رنا …؟
أجابتنى نعم… أزيك يا نيفين
قلت: أزيّك أنتِ يا رنا صوتك ماله..؟
أبداً مشكله مضايقانى شويه..
قلت : خير…؟
جوزى شكله بيعرف عليّا واحده.. ( وبدات بالبكاء)
قلت : أنتى متأكده يا رنا…؟
قالت وهى تتنهد : آه قلت : أزاى… فهمينى..؟
قالت : حاجات كتير أولها أسلوبه فى التعامل معايا أتغير جداً وبقى مش طايقنى ونومه لوحده فى غرفتنا وطلبه منى أنى أنام برّه بحجّة أن الولدالصغير بكائه بيزعجه
قلت : وأيه كمان..كملى..؟
قالت: سمعته أكتر من مره بيكلمها بعد ما بيدخل الغرفه ويقفل عليه…يشغل الأغانى على اللاب توب ويعلّى صوتها عشان ما اسمعهوش ويقعد بالساعه والساعتين..
قلت : وسمعتيه أزاى…؟
قالت : مره كان فاكرنى فى الحمام وما شغلش الأغانى….والمره التانيه كان عامل نفسه نايم ودخلت عليه فجأه بحجة أنى بأجيب حاجه م الأوضه وشفته ماسك الموبايل وبيكلمها قلت : يمكن بيكلم واحد صاحبه يا رنا.. قالت : حايكلمه ويقوله أنتى…!! كان بيقول أنتى وأنتى… قلت ( بتعاطف) : أيوه فهمتك.. قالت : نيفين…أعمل أيه ..؟ أنا حاتجنن ونار قايده فيّا.. قلت : معلش أهدى يا رنا…طيب قوليلى كان فى مشاكل بينكم قبل كده..؟ قالت: أيوه للأسف وكنت فاكراها حاجات عاديه وحاتنتهى لكن الموضوع طلع كبير ووراه واحده.. قاطعتها قائله : بصىّ..يا رنا…الموضوع لازم له جذور م الأول بينكم لازم فيه حاجه عميقه بوّظت العلاقه بينكم وأكيد فى رفض داخلى جوّاه لحاجات كتير فيكى خلاه يروح لغيرك ويهرب من علاقتكم بالطريقه دى…مش باقولك أنه صح وللا أنه مابيعملشى حاجه غلط…لكن أكيد فى سبب كبير..
تنهدت وقالت : أيوه…هو كان بيقوللى كده …كان بيقوللى أنى السبب فى توتر علاقتنا قلت: طيب ما تعرفى منه الأسباب كلها وتحسّنى العلاقه بينكم… قالت : واللهِ أنا عندى أستعداد أعمل أى حاجه عشان أصلح اللى بيننا على الرغم من أنى ما عملتش اللى يستحق كل ده…لكن مش مهم …المهم يرجع لى زى الأول.. قلت: يارب يا حبيبتى ربنا يصلح الحال ويكرمكم ويبعد الشيطان.. بس خللى بالك يا رنا الموضوع حاياخد وقت لازم تصبرى ولازم تستحملى الفتره الجايه دى حاتبقى عايزه منك محاولات وصبر…تمام…؟ قالت : ماشى حاحاول.. قلت: أبقى طمنينى عليكى قالت: حاضر ما تتخيليش لما باكلمك بارتاح قدّ أيه ربنا يكرمك واللهِ قلت: ربنا يخليكِ يا جميل ويطمننى عليكِ قالت: حاضر حابقى على أتصال بيكِ ما تقلقيش معلش يا نيفين دوشتك.. قلت : بطّلى الكلام ده أحنا أخوات بس ربنا يصلح لك الحال يارب
موضوع: اعمل ايه 
الثلاثاء أغسطس 04, 2009 7:19 am
